«Қайрат» пен «Ордабасы» қатарынан жеңіске жетіп, чемпиондық үшін сырттай тартысты жалғастырып келеді

Бұл күрес соңына дейін жалғасатыны анық.

«Жеңіс» жаңа бапкері тұсында алғашқы жеңісіне қол жеткізді. Жалпы, төмен сырғып бара жатқан «Жетісуға» қарсы сенімді жеңіс болды. Рас, пенальтиге қатысты бір сұрақ бар. Сол эпизодта қақпашы мен шабуылшы допқа бір уақытта тиген сияқты көрінді. Бірақ бұл тек YouTube-нұсқасында көрсетілген ракурстан осылай байқалды. Ал төрешіге жақсырақ көрінді. Сондықтан пенальти болды деп есептейміз. Тіпті олай болмаған күннің өзінде, астаналықтардың еңбегін ешкім жоққа шығара алмайды. Олар қарсыласын нағыз таптап өтті.

Қызылордада өте қызықты, нағыз триллерге айналған матч өтті. Екі команда да алаңда барын салды. Жалпы, ойынға деген жігері жағынан екі командаға да кінә артарлықтай ештеңе жоқ. Матч көрермендерге ұнағаны анық.

Мозес әдемі гол соққаннан кейін Нанидің оған қалай жауап берерін күттік. Шамасы, бұл жағдай оның намысын қайраған сияқты. Ол гол соғуға қатты тырысты: төмен түсіп, ойынға белсенді араласты, жиі өзіне жауапкершілік алды, қақпаға соққы жасады. Нани қарсылас қақпасына бірнеше рет қауіп төндіріп, тіпті Сосаға голдық пас берді. Бірақ оның Мозеске берген басты жауабы — «Ақтөбенің» «Қайсар-Арена» стадионынан алып кеткен үш ұпайы!

Екі апталық үзіліс алдындағы бұл жеңіс «ақ-қызылдар» үшін жай ғана жақсы нәтиже емес. Бұл — қайтадан жүлде үшін күреске қосылуға мүмкіндік. Сонымен қатар командаға асықпай ойындарын саралап, жіберген қателерін түзетуге уақыт бар. Әсіресе бұл Черевченко үшін маңызды.

Матчтың қорытындысы заңды болды: «Ақтөбе» жақсырақ ойнады, қақпаға көбірек соққы жасады және жеңіске лайық болды. Ал «Қайсар» екінші таймда әлдеқайда нашар ойнады. Бір сәтте тіпті ойнауды тоқтатқандай әсер қалдырды. Соның жазасын да тартты. Бәлкім, матчтан кейін «Қайсар» президенті Бақытжан Пазылхайырдың Ферапонтовқа қатты ұрысқаны да сондықтан шығар.

Даниэль Соса туралы да бөлек айту керек. Жігіт бабына еніп, нәтижесін көрсетіп жүр. Қазір ол клубтың ең үздік сұрмергені.
Айтпақшы, кезінде «Ақтөбенің» бұрынғы спорт директоры Сергей Доронченкодан нигериялық футболшы туралы сұраған едім. Сосаны Украинадан тауып, «Ақтөбеге» алып келген де сол болатын. Бұл оның клубтағы соңғы трансфері еді. Сонда одан: «Тәртібі қалай?» деп сұрадым. Сергей Викторович Сосаның Вернидуб мектебінен өткенін айтты. Ал оның командасында, бәрімізге белгілі, тәртіптен аттауға жол жоқ.