Екі бірдей командамыз Конференциялар лигасындағы жарыс жолын аяқтады.
«Астана» үшін бәрі жақсы басталды. Бірінші таймнан кейін команда 1:0 есебімен алда болды. Алайда кейін Кажукуловас (Чондричтің де «көмегімен») екі сары қағаз алып, алаңнан қуылды. Осыдан кейін ойынның бағыты өзгеріп кетті. Орталық қорғаушының жоқтығы қатты сезілді. Матч қосымша уақытқа ұласып, онда албаниялықтар тағы екі гол соқты.
Өкінішке қарай, «Астананың» жеңілісіне Йосип Чондричтің қателігі әсер етті. Команданың келесі кезеңге өтуге жақсы мүмкіндігі болған еді.
Семейдегі матч, керісінше, өте сәтсіз басталды. Кездесудің алғашқы минуттарында-ақ Игор Габриел өрескел қателесіп, сәтсіз пас берді. Ал 120-минутта өз қақпасына гол соқты. «Елімай» да Конференциялар лигасының екінші іріктеу кезеңіне шығуға бір қадам қалған еді. Бірақ жолы болмады. Мұндай нәтиже өте өкінішті. Көңілде үлкен қапа ғана қалды.
