Турнирлік тұрғыдан ҚПЛ-дың 21-турының екінші ойын күніндегі басты матч – «Астана» мен «Оқжетпес» кездесуі.

Екі команда да үшінші орын үшін күресіп жатыр. Елорда командасы бұл ойында жеңсе, көкшетаулықтарды қола жүлде үшін күрестен шеттетіп, өз позициясын нығайта алады. Ал «Оқжетпес» жеңіске жетсе, «Астанамен» арадағы айырмасын қысқартуға мүмкіндік алады.

Бір қызығы, бұл турда «Ақтөбе» де жүлделі орындар үшін күреске қайта араласуы мүмкін. Оның үстіне ақ-қызылдардың төртінші, яғни еурокубокқа жолдама беруі ықтимал орынға да таласу мүмкіндігі әлі бар.
Интрига жағынан ең қызықты матч – «Ақтөбе» мен «Атырау» кездесуі. Өйткені Самат Смақов пен Данияр Шадиев қарсылас команданы жақсы біледі. Дегенмен олар үшін «Ақтөбеден» ұпай алу – жеке бастың мәселесі емес, турнирлік міндет. Жаңа командасына қазір ұпай ауадай қажет.

Бұл ойында бас төреші қызметін Антон Кучма атқарады. Ол туралы жергілікті пабликтерде алдын ала сөз де айтылып үлгерді. Сірә, сақтық үшін болса керек.
Алайда «Ақтөбе» толық күшіне салып ойнаса, (әсіресе Петропавлдағы матчтың бірінші таймындағыдай футбол көрсетсе) өз мүмкіндіктерін пайдалана білсе, төрешінің шешімдері ойын нәтижесіне әсер ете қоймас. Кучма екеу болса да, үшеу болса да, нәтижеге әсер ете алмайды.

Ал егер ақ-қызылдар өздері қиындық тудырып, алаңда жай жүріп, бірнеше метрден гол соға алмай жатса, онда жағдай басқаша өрбуі мүмкін. Бірақ бұл жерде басты мәселе – төреші емес. Команда үшін жаттықтырушының ауысуы маңызды эмоциялық серпіліс болуы ықтимал. Оның үстіне Сэм мен Дони ойыншыларды психологиялық тұрғыдан жігерлендіріп, олардан барынша көп нәрсе алуға тырысатыны анық.

Ақыры, «Елімайға» өте жоғары мотивациямен келген қарсылас қонаққа келді. Оның үстіне географиялық көршісі. Семейліктерге де, павлодарлықтарға да қазір жағдайды қиындатуға болмайды. Оларға ұпай жинау қажет. Біріншілері жүлделі орындар үшін (иә-иә, дұрыс естідіңіздер) күресіп жатыр, ал екіншілері 2027 жылғы Премьер-лигада қалу үшін таласуда.
Сондықтан шығыс дербиі тартысқа толы өтуі тиіс.